He kupu whakataki
He huinga pukapuka a Te Tautoko i whakatakotoria hei rauemi reo Māori e pā ana ki te ao Māori i roto i te horopaki, mō ngā rā o mua, o tēnei wā tonu, me ngā rā e heke mai nei. Ka tautokohia hoki ngā whāinga matua o ia marau, arā, ko te reo Māori, pāngarau, pūtaiao, hangarau, ngā tikanga ā-iwi, ngā toi me te hauora mō ngā taumata toru ki te ono. Ka noho mai he kōrero paki, he kōrero pono anō hoki hei tūāpapa, ā, ko te tikanga, mai i reira ka toro haere ngā ākonga i ngā mahi takitahi, i ngā mahi ā-rōpū, i ngā mahi ā-akomanga rānei i te roanga atu o ngā kōrero.
Kua hora mai a Te Tautoko 60 nei hei whāwhātanga mā te hunga e ako ana i te reo Māori me ōna tikanga.
Te whakamahi i tēnei huinga pukapuka
Mā te pouako tēnei pukapuka hei āwhina, hei tautoko, i āna mahi whakarite mahere ako mā ngā ākonga. Ka arotahi ki Te Reo Māori i roto i te Marautanga o Aotearoa, ki ngā whāinga paetae, ngā pūkenga, ngā kawenga, me ngā aromatawai. Ko te kaupapa matua, ko Tangaroa, me ngā kaupapa whāiti, pēnei i 'He wai tai, he wai māori', te horopaki e hāngai ana ki te taumata me tāu e hiahia ana mō āu ākonga. Whakawehea ia whenu, kia whakawhanake i ngā pūkenga o ngā ākonga. Tērā pea ka hiahia koe ki te whakatārua i ngā wāhanga o tēnei pukapuka hei tāpiri atu ki tāu mahere.
Te kaupapa matua o Te Tautoko 60
He kōrero tō tēnā iwi, tō tēnā iwi, tō tēnā rohe, tō tēnā rohe mō ngā atua, mō ngā kaitiaki Māori. Ko te kōrero nei he kōrero whānui e pā ana ki a Tangaroa, arā 'ko Tangaroa ki tai, ko Tangaroa ki uta'. E mōhiotia whānuitia e te nuinga o te tangata Māori ko Tangaroa te atua o te moana, ā, ko ia hoki te atua o ngā awa me ngā roto. He kōrero whakamārama tēnei pukapuka mō tōna whakapapa, mō te hononga ki ngā atua o ētahi atu whenua, he tikanga whānui, me ngā whakatūpatotanga mehemea ka haere ki te awa, ki te roto, ki te takutai rānei ki te kohi kai, ki te hī ika, ki te aha rānei.
Ngā kaupapa whāiti o Te Tautoko 60
E waru ngā kaupapa whāiti hei mahi, hei rangahau mā ngā ākonga, mā te pouako hoki:
- Te atua o te moana – he kōrero whānui e pā ana ki a Tangaroa puta noa i te ao
- He wai tai, he wai māori – he whakamārama ki ngā rerekētanga o ngā momo wai
- Te mana o Tangaroa – he kōrero tuku iho
- He tikanga, he ritenga, he māramatanga – he tikanga whānui
- Tangaroa ki tai – he kōrero whakamārama i ētahi tikanga tawhito me ngā tikanga hou mō te haere i te moana
- Tangaroa ki uta – he kōrero e pā ana ki ētahi tikanga tawhito me ngā tikanga hou o te awa
- He tauparapara – nā Chē Wilson i tito
- Tauawhi, he rotarota – nā Hera Black-Taute i tito.
