He kupu whakataki
He huinga pukapuka a Te Tautoko i whakatakotoria hei rauemi reo Māori e tautoko ana i ngā wāhi whāinga matua ki tā Te Reo Māori i roto i te Marautanga o Aotearoa, me te whakaatu hoki i ngā kaupapa whānui e pā ana ki te pāngarau, te pūtaiao, te hangarau, ngā tikanga ā-iwi, ngā toi, me te hauora i roto i ngā kaupapa kawea ai e ngā ākonga i ia rā. Ka noho mai he kōrero paki, he kōrero pono anō hoki hei tūāpapa, ā, ko te tikanga, mai i reira ka toro haere ngā ākonga i ngā mahi takitahi, i ngā mahi ā-rōpū, i ngā mahi ā-akomanga rānei i te roanga atu o ngā kōrero.
Kua hora mai a Te Tautoko 54 nei hei whāwhātanga mā te hunga kua ono tau, ā piki ake, e whakaakona ana ki te reo Māori.
Te whakamahi i a Mā Te Pouako
Kua whakatakotoria ētahi ngohe hei mahi mā ngā ākonga. Tīpakohia ngā
whāinga paetae, te kawenga
(ngohe) e hāngai ana ki te taumata e tika ana
mō āu ākonga. Whakawehea ia whenu, kia whakawhanake i ngā pūkenga o
ngā ākonga. Tērā ka hiahia koe kia tāruatia ngā wāhanga o tēnei pukapuka hei tāpiri atu ki tāu mahere.
Ngā whāinga paetae
Kei te whārangi e whai ake nei ko tētahi mahere hei āwhina. Ka tohua ngā whāinga paetae mai i ngā whenu o Te Reo Māori i roto i te Marautanga o Aotearoa, me ētahi atu o ngā marautanga o Aotearoa i ngā wāhi e tika ana, e hāngai ana ki ia kōrero. Koinei ngā whāinga paetae mai i ngā kōeke 3–5 me ētahi pūkenga e hāngai ana ki te kaupapa o Te Tautoko 54 hei āwhina atu i ngā pouako.
