He kupu whakataki
I whakatakotoria tēnei huinga pukapuka, a Te Tautoko, hei rauemi reo Māori e pā ana ki te ao Māori i roto i te horopaki o ngā rā o mua, o tēnei wā, me ngā rā e heke mai nei. Ka tautokona ngā whāinga matua o ia wāhanga o te marautanga, arā, te reo Māori, te pāngarau, te pūtaiao, te hangarau, ngā tikanga ā-iwi, ngā toi, me te hauora mō ngā taumata 3 ki te 6. Ka noho mai hei kōrero paki, hei kōrero pono, hei tūāpapa, ā, ko te tikanga, mai i reira ka toro ngā ākonga ki te mahi takitahi, ā-rōpū, ā-akomanga rānei i te roanga atu o ngā kōrero.
I horahia a Te Tautoko 66 hei whāwhātanga mā te hunga kei te ako i te reo Māori me ōn a tikanga.
Te whakamahi i tēnei pukapuka
Hei āwhina, hei tautoko tēnei pukapuka i te pouako i a ia e whakarite mahere ako ana mā ngā ākonga. Ka arotahi ngā whāinga paetae ki Te Marautanga o Aotearoa. E hāngai ana te horopaki ki te kaupapa matua, arā, ko Ngā Matatini a Tāne, ki te taumata me tāu e hiahia ana mō āu ākonga. Whakawehea ngā whenu, hei whakawhanake i ngā pūkenga o ngā ākonga. Tērā pea, ka hiahia koe ki te whakatārua i ngā wāhanga o tēnei pukapuka hei tāpiri atu ki tāu mahere.
Te kaupapa matua o Te Tautoko 66
Ko te kaupapa matua o Te Tautoko 66, ko Ngā Matatini a Tāne.
E aru ana te ia me te au o te nuinga o ngā Hei Mahi nei i ngā wāhanga ako o ngā toi, pūtaiao, hauora, te reo Māori, me te hangarau. Me tāutuutu, me kōwhiriwhiri, me tīpako, me tūhura hoki te ākonga i ngā tini wheako hei kete pūtea whanonga rangatira, hei manaaki, hei ārahi i tōna tupu hoki i roto i te ao, me te ako ki te tuitui i te hononga o te tangata. Ko te pānga hoki o te tangata me ōna tikanga, ritenga hoki – pēhea oti te pānga ki te taiao? Koia i tika ai kia mōhio hoki te ākonga ki te pānga o te tangata ki te taiao, me pēhea a ia e tū ai hei kaitiaki tōtika pai hoki mō tōna taiao. Ko te mahi tukurua tētahi mahi me whai e tātou hei tiaki i te taiao, me kimi, me rapu kaupapa, mahi hoki hei whakatupu anō i ngā mea oreore manawa ora kia kapi katoa te mata o te whenua, o runga, o raro, nō te mea, e tātai honohono ana tātou ki a tātou anō. Inā hoki rā ki te whakataukī nei, “Hinga atu he tētēkura, ara mai he tētēkura”, arā, ko te tikanga o te ao tūroa, huri atu, huri mai, huri atu, huri mai, ka toitū te ora o te ao mō ake tonu atu.
Ngā kaupapa whāiti o Te Tautoko 66
E toru ngā kaupapa whāiti hei mahi, hei rangahau mā ngā ākonga, mā te pouako hoki:
• Te Riri o Tāwhirimātea ki a Tāne-mahuta
• Te Kauri
• Te Tangi a te Ruru
