He kupu whakataki
I whakatakotoria tēnei huinga pukapuka a Te Tautoko hei rauemi reo Māori e pā ana ki te ao Māori i roto i te horopaki, mō ngā rā o mua, o tēnei wā, me ngā rā e heke mai nei. Ka tautokona ngā whāinga matua o ia marau, arā te reo Māori, pāngarau, pūtaiao, hangarau, ngā tikanga ā-iwi, ngā toi, me te hauora mō ngā taumata toru ki te ono. Ka noho mai he kōrero paki, he kōrero pono hei tūāpapa, ā, ko te tikanga, mai i reira ka toro ngā ākonga ki te mahi takitahi, ā-rōpū, ā-akomanga rānei i te roanga atu o ngā kōrero.
I horahia a Te Tautoko 64 hei whāwhātanga mā te hunga kei te ako i te reo Māori me ōna tikanga.
Te whakamahi i tēnei pukapuka
Hei āwhina, hei tautoko tēnei pukapuka i te pouako i a ia e whakarite mahere ako mā ngā ākonga. Ka arotahi ngā whāinga paetae, ngā pūkenga, te kawenga, me te aromatawai ki Te Reo Māori i roto i te Marautanga o Aotearoa. E hāngai ana te horopaki kei te kaupapa matua, arā ko te Kīngitanga, ki te taumata me tāu e hiahia ana mō āu ākonga. Whakawehea ngā whenu hei whakawhanake i ngā pūkenga o ngā ākonga. Tērā pea, ka hiahia koe ki te whakatārua i ngā wāhanga o tēnei pukapuka hei tāpiri atu ki tāu mahere.
Te kaupapa matua o Te Tautoko 64
Ko te kaupapa matua o Te Tautoko 64, arā ko Kīngitanga. Kei konā ngā kōrero e pā ana ki ngā waka taua o Tūrangawaewae, ki tētahi kōrero mō Te Puea, me ngā āhuatanga i pā ki tētahi mokopuna i te matenga atu o Te Arikinui Te Ātairangikaahu.
Ngā kaupapa whāiti o Te Tautoko 64
E toru ngā kaupapa whāiti hei mahi, hei rangahau mā ngā ākonga, mā te pouako hoki:
- Ngā waka taua o Tūrangawaewae
- Te wā e tupu ake ana ahau i Tūrangawaewae
- He tohu aroha mō Te Arikinui
