Kua rongo anō koe kei te wera haere a Papatūānuku?

Ngā hōpara tauanga
I roto i ngā horopaki whai tikanga, me mōhio te ākonga:

• ki te whakarite hōpara tauanga i runga i te whakaaro ki tētahi kaupapa whakamātau rānei e whai tikanga ana
• ki te kohikohi raraunga hāngai
• ki te kōwhiri, ki te hanga whakaari raraunga tōtika (tūtohi auau, kauwhata pou, kauwhata pouhere) hei whakaatu āhuatanga tāpua o roto i ngā raraunga ine.

Te whakamāori pūrongo tauanga
I roto i ngā horopaki whai tikanga, me mōhio te ākonga:

• ki te whakamārama i ngā āhuatanga kōhure (ngā mōwaho, ngā rāpoi, me te āhua o te tuaritanga raraunga) i roto i ngā whakaari raraunga
• ki te arotake i ngā whakamārama whakaari raraunga a ētahi atu
• ki te tāpae whakaaro ki ngā pānga, ki ngā mahi rānei ka takea mai i ngā otinga o tētahi hōpara tauanga.

Ngā hōpara tauanga

Ka pānui te kaiako i te kōrero ki ngā ākonga, kātahi ka pānui ā-whatu ngā ākonga kia waia haere rātou ki te kōrero.

Me mahi takirua ngā ākonga. Mā ia tokorua tētahi hōpara tauanga e āta whakarite mō ngā tauira mahi hei tiaki i te whenua, i te ao (arā, te haere mā raro). Ākene pea ka pātaihia ko ngā ākonga nō roto i ō rātou akomanga ake; tērā pea, ka puta atu ki ētahi atu akomanga – kei ngā ākonga te tikanga. Me āta whakarite ngā pātai kia hāngai pū ki tā rātou e rangahau ai. Me whakarite he tūtohi tatau kia kohia ngā raraunga (me whai whakaaro ngā ākonga ki te rahi o ngā ākonga i roto i te/ngā akomanga).
Hei tauira:

I nāianei me āta whiriwhiri i tētahi huarahi pai hei whakaatu i te raraunga kua kohia. Me whakaatu i ngā momo kauwhata e tika ana, arā, i te kauwhata pou, kauwhata porohita, kauwhata tāhei rānei.

Te whakamāori pūrongo tauanga
Ko tā ia tokorua he āta whakarite i ngā raraunga, he whakaatu mai i tētahi tūtohi, i tētahi kauwhata hoki. Me whakaatu te raraunga ki te katoa. Me āta whakamārama i ngā āhuatanga o te mahi arā, i te painga, i te kino, i te tika, i te aha atu rānei. Ka mutu me āta whakatau e te tokorua ō rāua whakaaro kia puta mai ai tētahi kōrero whānui mō te āhua o te mahi, mō te raraunga, mō te kaupapa rā anō.
Hei tauira:

• Ka pēhea ōu nā whakaaro ki te mahi?
• Ki ōu nā whakaaro, ka āwhinatia te ao e ēnei mahi?
• He aha ngā painga o te haere pēnei ki te kura?
• He aha ngā āhuatanga pai ka pā ki a Papatūānuku? Matapaehia.
• Tokohia ngā ākonga ka hīkoi mai ki te kura? Tokohia ka haere mā runga pahi, waka, paihikara rānei?
• He tokoiti, he tokomaha rānei?
• He aha rātou e pērā ai?
• Mēnā he tokoiti ka haere ki te kura mā ēnei momo, me pēhea tāua e huri ai i ō rātou whakaaro kia tīmata ki te whakamahi i tētahi atu momo?
• Tukua mai he tāpae kōrero hei whakamārama i ngā otinga o te hōpara tauanga.
• Ka pēhea te whakamahi i ngā otinga kia mārama te tangata ki tāu e tāpae nei?