Te Wharekura 72 – Kawiti
He kōrero mō Hineāmaru: Hei mahi
Ka tuhi te ākonga i tētahi pūrongo poto e pā ana ki te tupuna, a Hineāmaru mai i te kōrero kei roto i te pukapuka ākonga me ngā rangahau a te ākonga. (Tuhituhi, kōeke 6)
Me tuhi te ākonga i ngā take ō Hineāmaru kia noho ai i runga i tērā whenua nō rātou. Me rangahau hoki te ākonga i ētahi atu take e pā ana ki te nohonga o ngā tūpuna nō mua noa atu kei tēnā tōpito, ahakoa he nohonga ā-torohanga, he nohonga ā-muru, he nohonga ā-raupatu, me ērā atu anō. (Tuhituhi, kōeke 6)
Ka pānuitia e te pouako te whakataukī, 'Ko ngā kai tūkau o te maara o Hineāmaru'. Ka kōrerotia te momo rerenga kōrero, me ngā kupu e rangona ai te wairua o te whakataukī. Kātahi, ka tuhi ngā ākonga i ā rātou ake whakataukī e whakaatu ana i te wairua o ō rātou whakaaro. (Tuhituhi, kōeke 6)
Hoatu ēnei whakataukī e whai ake nei ki ia ākonga:
- Te pouaka a Hineāmaru
- Ngā tao horo a Hineāmaru
- Te motumotu o te riri a Hineāmaru
- Ko ngā kai tūkau o te maara a Hineāmaru
- Te tītī o te rua a Hineāmaru
Ko tā te ākonga he wetewete i ngā rerenga kōrero nei, ā, he tuhi i ngā kōrero māmā e kawe tonu ana i te tino kaupapa o taua rerenga kōrero. Hei kīnaki ki tēnei mahi, kia pātai te pouako ki ngā ākonga kia rangahau i ngā whakataukī a ngā tūpuna o ia ākonga. (Tuhituhi, kōeke 7)
