Te kawa o te Whānau a Apanui – pāeke
Nā Roka Paora
Nā Gus Hunter ngā pikitia
Ko Whanokao te maunga,
Ko Mōtū te awa.
Ko Apanui te tangata.
Ki te hunga māna ēnei kōrero, tēnā koutou, tēnā koutou katoa. Ko ngā kōrero o tēnei putanga o Te Wharekura e pā ana ki te kawa o ētahi o ngā iwi o Aotearoa. Ko tāku ko te kawa o Te Whānau a Apanui.
Tekau mā toru ngā hapū o tēnei rohe, mai i Pōtaka i te tairāwhiti, ki Hāwai i te taihauāuru. Tekau mā toru o ēnei hapū noho ai i te takutai kei mua, ko ngā maunga kei muri, ā, anga katoa ai ngā wharenui ki te moana. Kotahi anake te hapū kei te tuawhenua. He whāiti te whenua e nōhia nei e Te Whānau a Apanui. I ingoa katoatia ngā hapū o tēnei iwi ki ngā tīpuna me ngā uri o Apanui. Kei Pōtaka ko te Whānau a Tapaeururangi, kei Whangaparāoa ko te Whānau a Kauaetangohia, kei Raukōkore ko te Whānau a Pararaki me te Whānau a Maru, kei Pāhāoa ko te Whānau a Kāhu, kei Maungaroa ko te Whānau a Kaiaio, kei Te Kaha ko te Whānau a Te Ehutu, kei Waiōrore ko te Whanau a Hinetekahu, kei Ōtūwhare ko te Whānau a Rūtāia, kei Omāio ko te Whānau a Nuku, kei Whitianga ko te Whānau a Tūwāhiawa, kei Maraenui ko te Whānau a Hikarukutai, kei Hāwai ko te Whānau a Haraawaka. Mai i te tau kotahi mano e iwa rau, i karangatia ai te hapū o Omāio ko Ngāti Horowai, ko tō Whitianga ko Ngāti Paeakau, ko to Maraenui ko Ngāti Horomoana, nōtemea tekau mā ono ngā tamariki, tokorua ngā pakeke i toromi i te awa o Mōtū i taua tau.
Engari, i ētahi wā, ka whakahuahua tonu ēnei hapū ki ngā ingoa tīpuna. Ko ētahi o ngā kawa o Te Whānau a Apanui he ōrite, ā, he āhua rerekē anō tā ētahi o ngā hapū.
Ko ngā mea ōrite
Ahakoa he aha te hui, ka waea haeretia te hapū, te iwi rānei, kia mōhio ai i te take o te hui, ka tū taua hui ki hea, he aha te tāima o te hui. Ka pērā anō mehemea he tangihanga, kia tae wawe mai ai te tangata whenua ki te whakareri i te marae. Ko te wahine karanga, tū ai i mua i te amo o te taha katau o te wharenui. Ka tū i reira ka karanga hāngai tonu atu ki te manuhiri whakaeke, ka tuohu, ka tangi rānei. Kia noho rawa te manuhiri, kātahi anō ia ka noho. Ko te paepae kei āhua kō atu i te taha katau o te wharenui. Kei muri ko te tangata whenua. Karanga ana te wahine karanga ki te manuhiri, ka tū te paepae me te tangata whenua. Mehemea ehara i te tangihanga, ā, kei te tū noa te manuhiri, ka karanga atu tētahi o te paepae "kua ea." He tohu tēnei ki te manuhiri kia noho. Kia āta tau rātou, kātahi anō te paepae me te tangata whenua ka noho. Kāore te iwi kāinga e kōpikopiko ana i mua i te wharenui, i mua i te paepae i te wā he manuhiri kei te noho i runga i te marae. Mehemea kei te hiahia neke tētahi, me haere mā muri o te wharenui.
Ko te kawa whaikōrero o Te Whānau a Apanui he pāeke. Ka tū ia kaikōrero, he tāne o te paepae o te marae, ki te mihi ki te manuhiri, ki te waiata hoki. Kia mutu rawa tā rātou, kātahi anō te paepae o te manuhiri ka tū mai ki te whakautu, ki te waiata, ā, ka whakatakoto i tāna koha. Kia noho rawa ia, kātahi anō tētahi o te paepae tangata whenua ka haere atu, ka tango i te koha, ka mihi atu ki te manuhiri. Ko ngā koha whakatakotoria ki runga i te marae, ka riro mō ngā raruraru o te marae, ā, ka hoatu rānei ki te hunga nā rātau te hui.
Kāore ngā wāhine o Te Whānau a Apanui e whaikōrero ana i runga i te marae, engari tū ai ki te waiata, ki te tautoko i ngā kaikōrero. Kāore hoki te wahine e noho ana i te tūru o te paepae. Engari ka āhei ki te kōrero i roto i te wharenui. Mai rānō, mai rānō, tēnei kawa. Kia tae ki te wā rūrū, ki te hongi rānei, ka haere mai te manuhiri ki te paepae i te tuatahi, ā, ki te tangata whenua e rārangi ana i mua i te wharenui. Noho tuwhera ai te kuaha o te wharenui mai i te tīmatatanga o te hui, i te wā hoki he manuhiri kei runga i te marae. He tohu manaaki tēnei i te manuhiri; ka āhei rātou ki te moe iho. Kia mutu te rūrū, ka karangatia te manuhiri ki te kai. Kia uru katoa atu rātou, kātahi anō te tangata whenua ka kuhu atu ki te wharekai.
Ka tae anō ki te wā tika, arā, kia māmā ngā nekeneke o te marae ka haria mai e te manuhiri ā rātou kawenga ki roto i te wharenui. Ko rātou ki te tara nui o te whare moe ai, ko te tangata whenua ki te tara iti.
Kia mutu te hapa i te ahiahi, ā, kia oti te horoi ngā pereti, ka patua te pere, ka emi katoa mai te manuhiri, te tangata whenua me ngā ringwera ki roto i te wharenui ki te karakia. Kia mutu te karakia, ka putaputa te hunga e hiahia ana ki te hoki ki te kāinga, ka noho tonu te nuinga. Hei konei ka tīmata ngā mihi ā whare, mai i te tērā iti, ā, huri noa ki te tara nui. Kāore he tangata e poka noa ki te puta, ki te tomo mai rānei ki roto i te whare i te wā e whaikōrero ana. Kia tau rawa te kaikōrero, kia mutu rānei tana waiata, kātahi anō ka puta atu, ka tomo mai rānei he tangata. Kia mutu rawa ngā mihi ā whare, kātahi anō te kapu tī o te pō mā te katoa.
I te ata, ka whakhaeretia he karakia ki te wharenui, ka parakuihi, ā, mēnā kei te hoki te manuhiri, ka riro māna tonu e kī mai. Mō muri te tangata whenua poroporoaki ai. Mehemea he tawhiti te kāinga o te manuhiri ka whakakīia e te ringawera he pouaka kai mā rātou hei kai i te huarahi.
Ko ngā kawa āhua rerekē
Ko ēnei ētahi kawa āhua rerekē, a ētahi o ngā hapū o te Whānau a Apanui. E rima ngā hapū kua whakatū wharemate ki runga i te marae, ko te nuinga, tangi ai i ō rātau mate i runga i te parani, i te taha mauī o te wharenui. I te pō ka haria te tūpāpaku ki rō whare. Mehemea he āwhā, ka whakahaeretia ngā tikanga katoa o te tangihanga ki roto i te wharenui. Kei ia hapū tonu te tikanga ki hea te tūpāpaku takoto ai.
Kotahi tonu te hapū kuhu ai i te tūpāpaku ki rō whare mā te matapihi. E whā ngā marae tono karere tāne ai, ki te tūtaki i te manuhiri i mua i te tomokanga mai ki te marae. Ko tāna mahi he whakamōhio i a ia ki a rātou, he pātai atu nō hea rātau, ko wai rātou, ā, i te wā kua reri mai te tangata whenua ki te pōhiri mai i a rātou. Kia karangatia te manuhiri ka ārahitia mai e te karere nei, ā, kia tae ki te whakautu i te karanga ka whakawātea i a ia, ka huri haere ki te paepae, ka whakamōhio atu ko wai te manuhiri, a, no hea hoki rātou. Ko ētahi o ngā hapū whakanoho ai i te manuhiri ki te taha katau o te wharenui, ko ētahi ki te taha mauī, ko ētahi hāngai tonu ki te roro o te whare.