Hei mahi

Nā Cass Tangaere i whakamāori

Te ora i te moana

Whakawhitiwhititia ēnei whakaaro i rō rōpū, i te taha rānei i tētahi hoa:

1. He aha ngā tohu e hiahiatia ana e ngā tāngata ka haere i runga i te waka pēnei? He aha ngā whakariterite mā rātau mō tēnei haere?
2. He aha ki ōu whakaaro ngā tino rawa hei kawe i runga i tēnei wharaunga?
3. He aha ngā mahi hei mahi māu ki te whakaāhuru i te waka i a koe e whakatinana anō nei i ēnei rerenga moana makoako a ngā Māori?
4. Whakaarotia ko koe tētahi o te rōpū kua pae ki runga i tētahi motu iti mō ngā mārama maha tonu, e tere haere ana rānei i runga waka iti mō ētahi wiki. He aha te tino mea me whiwhi koe mō to oranga i a koe e tatari nei mō tōu whakaoranga. Me whakaaro mō ngā pūrākau kua rongo, kua kōrerotia rānei e koe mō ngā tāngata i ora tonu — i roto i ngā huka pūkeri, i te ahi, i ngaro i roto i te ngahere, te moana, ngā ngahere tino nui tonu, te koraha, i ērā atu āhuatanga makoako rānei.

He aha tō whakautu?

1. I whakaaro a Matahi (te kaitito) kua ngaro kē ēnei tikanga reremoana a ngā Māori. Nāna i pēhea te whakatika i tēnei tū āhua?
2. E rua noa iho ngā rākau i āhei a Matahi ki te turaki i roto i te ngahere. He aha a ia i mōhio ai ko ēhea ngā rākau e tika ana?
3. Ko te hiahia a Matahi he tere mai i Aotearoa ki Rarotonga, ā, ko tā Francis hiahia he tere mai i Tahiti ki Aotearoa. I pēheatia e rāua te whakatau i tēnei āhuatanga?
4. E hia te nui o te wai unu e hiahiatia mō te haere mai i Tahiti ki Rarotonga, ā, mai i Rarotonga ki Aotearoa?
5. Kāore he kahokaho whakaora i runga i te waka. Me pēhea te ārai i te takanga o te tangata ki roto i te moana?
6. E toru mano pea ngā puare iti i kōwiria ki roto i ngā takere. He aha i kore ai te waka i totohu?
7. I waihangatia te tira me te kotokoto i te rākau inanga. I pēheatia e rātau te rongoā i te rākau inanga hei aukati i te pirau?
8. Kāore a Francis rāua ko Matahi i mōhio ki te whakatere i te waka. Nā rāua i pēhea te whakatau i tēnei tū āhua?
9. Kāore rātau i whakaaetia te wehe atu i te whenua Wīwī o Tahiti, kia taea rawa e rātau te wānanga ka taea e te waka tēnei haere. I pēheatia e rātau tēnei?

Te mea e noho hē ana

Titiro ki ia rōpū o ēnei kupu. Whakaritea ko tēhea kupu e noho hē ana. Tuhia tāu i whakaaro ai, ā, ka whakamārama mai he aha i tohua ai e koe ko tēnei kupu.

Ina ka oti i a koe te katoa o ēnei rōpū, e hoki anō ka kimi i tētahi atu kupu mai i ēnei rōpū kupu e noho hē ana ki ōu whakaaro, ā, ka whakamārama he aha i tohua ai e koe ko tēnei.

Te whakatere āmio haere i te kura

Whakamātauria tōu tohungatanga ki te wetewete i ngā whakararu e pā ana ki te whakatere.

1. Ko ngā raukapakapa he wāhanga toina e herea ana ki te tira me te kotokoto. Ka oreore ēnei i te pupuhi a te hau. Mauria he toina, he rīpene rānei ki waho o te kura i te wā e pupuhi kaha ana te hau, ā, ka kite koe e ahu pēhea mai ana te hau i tēnā wāhi, i tēnā wāhi o te kura.
2. Ko te rā tonu te tino tohu e whāia ana i roto i ngā whakatere o te rā. Haria he rākau ine kotahi mita te roa ki waho i te wā e whiti ana te rā. Whakatū hāngaitia, ā, ka tuhi i tōna ata ki runga i te whenua. Hoki mai anō kia hipa tekau — rua tekau miniti, ka whakatū anō i te rākau ine ki taua wāhi anō. Tuhia anō tōna ata. He aha te rerekētanga ki te roa me te takoto a te ata ināianei?
3. E ū ana ngā rōpū waka ki ngā hau roa i runga i ā rātau haere. Kāore he hau roa i Aotearoa. Rēkoatatia ngā huarahi ahu mai o te hau, me tōna kaha anō, kia toru wā i ia rā mō te wiki, ā, ka whakarite i āu whakaturanga ki ērā e whakapaohotia ana e te reo irirangi.
4. E whai wāhi ana hoki ngā moutere me te pāpaku o te wai i ngā hotu o te moana. E kitea ana ēnei tohu e ngā kaiwhakatere mātau. Waihangatia he moana i roto i te kūmete pupuri wai. Hangaia he moutere me te tāhuna ki roto. Whakaterehia he rākau ki runga i te wai, ā, ka mapumapu kia āmai te wai. Titiro ki te whai wāhi o te moutere, me te pāpaku o te wai i runga i ngā ngaru o te wai.

Ki runga ^