Te wehenga o ngā manu
Nā Nehu Gage rāua ko Rangi Black
Nā Cliff Whiting te pikitia
KAIKŌRERO: I mua rāno ka huihui ngā manu o te moana me ngā manu o te tuawhenua i runga i tētahi papa pari. Ka ki atu ngā manu o te moana, ki ngā manu o te tuawhenua. Haere mai tātou ki te whakataetae. Ka tū atu te rangatira o ngā karoro.
KARORO:
Tihei mauri ora, tēnā koutou tēnā tātou katoa. [Ka whana te waewae o te kōrero.] He waewae kaha, he waewae rukumoana, hopu ika hoki. [Ka umere, ka pakipaki ngā karoro. Ka tu mai ko te rangatira o ngā manu o te tuawhenua, ko te kawau.]
KAWAU:
He waewae kaha he waewae rukuawa, hopu tuna hoki.
[Ka umere, ka takatakahi ngā waewae o tōna iwi manu. Ka tū anō te toa o ngā karoro. Ka waiata ia.]
KARORO:
Karoro rere rangi
Rere tawhiti
Tere rere, rere tere.
Ka whakatautau ngā manu moana.
[Ka tu mai te toa o ngā manu o te tuawhenua]
KAWAU:
Manu o te tuawhenua mau tonu ki tō tūrangawaewae.
[Ka haka ngā manu o te tuawhenua. Ka mau te wehi]
KAIKŌRERO:
Kātahi ka kōrerorero ngā manu, ki a rātou anō, ka oti te whakarite, me rere a KAWAU ki te hopu tuna ka whakahoki mai. Te hokinga mai o ngā manu nei ka tū mai ko te Kawau.
KAWAU:
Anei he tuna mahua, he tino reka tēnei kai ki a mātou.
KARORO:
Ai, ka pai hoki. Māngiangia ana te heke.
KARORO:
Anei tā mātou kai, he kumukumu te ingoa o tēnei ika.
KAIKŌRERO:
Ka rere atu a Kawau ki te ika a KARORO, ka horomia e ia, ka mau ki tōna korokoro. I a KAWAU e whakarāwa ana, ka poua e KARORO tētahi kata. I te kaha o te kata, puta tonu mai te tuna i tana tōu.
KARORO:
E hoa Kawau, kāre he oranga o tau kai, i nā ra, kāre i mau ki taku puku. Ēngari anō tāku kei te mau tonu i tō korokoro.
[I tēnei tonu ka katakata ngā manu moana.]
KAWAU:
Karoro, Karoro, i tō mahi hanariki, whaka- hawea taku iwi manu tuawhenua. E kore tātou e noho i runga i te āhuatanga o te kotahitanga.
KAIKŌRERO: Ka wehewehe ngā manu.