Ngaro atu te pō
Uwhia! Uwhia!
Uwhia te rā e te pō.
Pō! Pō! Pōuri ana e.
He tūpāpaku,
He tangi.
Ngā kuia,
Ngā koroua,
Te whānau pani.
Nā te ringa kaha o te mate,
Ka tangi,
Ka pouri,
Ka mamae.
He roimata,
He hūpe.
Ngā tohu taumaha o te mate.
He aroha anō rā.
He āwhina anō rā.
He hunga ora anō rā.
Ngā miro tuitui i ngā haehaetanga.
A te mate.
Whiti! Whiti!
Whitia te pō e te rā.
Ngaro! Ngaro!
Ngaro atu te pō!
Hei mahi
-
He kōrero tēnei mō te tangihanga.
- He aha te whānau pani?
- He aha te tikanga o te kōrero nei, 'te ringa kaha o te mate?' He aha te mate i whakaritea ai ki te ringa kaha?
- He aha te aroha, te āwhina, te hunga ora, i whakaritea ai ki te miro tuitui i te haehaetanga a te mate?
- He aha nga whakaaro atu kei roto i te wāhanga timata me te wāhanga whakamutunga o ngā kōrero nei?
- I tō rītitanga i ngā kōrero nei, he aha ngā pikitia i peitahia ki roto i ō whakaaro? Ko tēhea o ēnei?
- Te rā e tōana, te iwi i roto i te pōuri o te ao, i te pōuri hoki o te mate. Ā, ngā te āwhina me te manaaki o te iwi, ka whiti ano te rā ki te ao pōuri me te pōuri hoki o te iwi.
- Te marama e whiti ana i te pō. Te iwi e mahi whakangahau ana. Ā, i te whititanga o te rā ka hokihoki ratau ki te kāinga ki te moe.