Te hekenga nui
E hoa mā, i mōhio koutou ki te āhua o ngā tuna nei, arā, ngā tuna tame, e rima ki te whitu ō rātou tau e noho ai ki te wāhi kotahi i roto i te wai reka, arā, i te awa? Nā, mō ngā tuna uwha, e ono ki te iwa ō rātou tau e pēnei ai.
Tae mai ki te wā ka pakeke ngā tuna nei, arā, e tika ai me whānau a rātou kia whai punua tuna ai ngā awa, he pēnei te āhua. Ngā tuna uwha, tā rātou nei mahi he whānau hēki, nā, tā te tuna tame nei mahi hoki he whakatika i ngā hēki nei kia paopao.
Nā, ā te wā e tika ai ngā tuna nei mō te whānau, ka tīmata te heke. Te take i heke ai, nā te mea pea he karanga, he aha rānei. I ngā wā e heke ai rātou ko ngā pō tino pōuri nei, āwhā, ua; he pō tino kino nei, arā, ko ngā pō o te ngahuru.
I a rātou e heke ana, ka tīni haere ō rātou āhua. Ngā kanohi ka nunui haere, ngā kiri mangu e mōhio nei tātou ka huri haere ki te kara nei ki te āhua hiriwa. Ā, ka haere rātou, kore rawa rātou e kai.
Ka tata haere ki te moana e tika ai kia whānau ngā hēki nei, ka tino rite ngā tuna nei ki ngā tuna nō te moana kē. Kua tae rātou; tae pai ki te Moana-nui-a-Kiwa.
Ka mahi ngā tuna nei i ā rātou mahi, nā, i te tawhiti o tā rātou haere, i te aha rānei, ka pahemo ngā tuna nei, ka mate.
Ngā hēki nei, ka huri haere hei tuna, mai i te hēki kara pēnei i te karāhe, tae noa ki te wā e tae ai ki ngā māngai o ngā awa, kāhi anō ka rite ki ngā punua tuna e mōhio nei tātou.
Nā, haere ake i ngā awa, kai haere ana, kua tino tuna ngā mea nei. Ka noho rātou, ā, tae noa mai tō rātou wā e haere ai anō, arā, te heke nui ki te moana.