He kupu whakataki
I whakatakotoria tēnei huinga pukapuka a Te Tautoko hei rauemi reo Māori e pā ana ki te ao Māori i roto i te horopaki o ngā rā o mua, o tēnei wā, me ngā rā e heke mai nei. Ka tautokona ngā whāinga matua o ia marau, arā, te reo Māori, te pāngarau, te pūtaiao, te hangarau, ngā tikanga ā-iwi, ngā toi, me te hauora mō ngā taumata 3 ki te 6. Ka noho mai he kōrero paki, he kōrero pono hei tūāpapa, ā, ko te tikanga, mai i reira ka toro ngā ākonga ki te mahi takitahi, ā-rōpū , ā-akomanga rānei i te roanga atu o ngā kōrero.
I horahia a Te Tautoko 65 hei whāwhātanga mā te hunga kei te ako i te reo Māori me ōna tikanga.
Te Whakamahi i Tēnei Pukapuka
Hei āwhina, hei tautoko tēnei pukapuka i te pouako i a ia e whakarite mahere ako ana mā ngā ākonga.
Ka arotahi ngā whāinga paetae, ki Te Marautanga o Aotearoa. E hāngai ana te horopaki ki te kaupapa matua, arā ko Toitū Te Mana, He Toa, ki te taumata me tāu e hiahia ana mō āu ākonga. Whakawehea ngā whenu hei whakawhanake i ngā pūkenga o ngā ākonga. Tērā pea, ka hiahia koe ki te tārua i ngā wāhanga o tēnei pukapuka hei tāpiri atu ki tāu mahere.
Te Kaupapa Matua o Te Tautoko 65
Ko te kaupapa matua o Te Tautoko 65, ko Toitū Te Mana, He Toa. E aru ana te ia me te au o te nuinga o ngā kōrero i ngā kaupapa tikanga ā-iwi, otirā e taea te hono atu ki te toi ataata, te hangarau, me te wāhanga mō te reo. Me tāutuutu te ākonga i ngā tini wheako, me tīpako atu i ngā pūkenga, me arotau hoki ki ngā pūmanawa hoki o te toa me te āhua e hautipuatia ai rānei te tangata noa iho nei hei tuatangata i tōna ao.
Me mahara hoki e taea e te tangata noa iho nei ētahi mahi whakamīharo te whakatutuki, te whakaoti rānei ahakoa tupu iti mai, mēnā he mahi me oti!
Me aromatawai hoki te ākonga i tōna ao, me uiui, “Pēhea ake tōku ao mehemea ki te oti i a au, i a wai kē rānei tētahi mahi nui?” “Pēhea ake tōku ao ki te kore au e takoha ki te ao?” “He aha tōu koha ki te ao, he aha tā te ao koha ki a koe?” “Ka piki, ka heke rānei tōku oranga, te oranga rānei o te whānau, hapū, iwi rānei i tōku mahi pai, i tōku mahi kore pai rānei?”
Ngā Kaupapa Whāiti o Te Tautoko 65
E iwa ngā kaupapa whāiti hei mahi, hei rangahau mā ngā ākonga, mā te pouako hoki:
- Ngā Hautipua o te Ao Māori
- Te Pakarutanga o Te Terawea
- Huria Ngarongoa Katene Matenga
- Hokinga Mahara
- Toa
- Ko Wai mā Ōku Tuatangata?
- Hupa Rapi i Te Kura Māori o Porirua
- He Whakaruruhau Māhuri Tōtara
- Kei te Mōhio Rānei Koe?
