E Rongo e
Ngā hononga ki te marautanga
Te Reo Māori i roto i te Marautanga o Aotearoa (wh. 60)
| Whenu | Whakarongo (Kōrero) |
|---|---|
| Kōeke | 3 |
| Whāinga paetae | Ka whakarongo, ka mārama, ka pāhekoheko te ākonga kia mau, kia roa ai ngā whiriwhiri ā-rōpū i ngā tūmomo horopaki ako katoa. |
| Pūkenga | Ko te whakahiato i ngā āhuatanga o tōna ake ao hei whakamārama i ngā kōrero makere noa mai i ngā ngutu me ngā kōrero kua āta hopukina. |
| Kawenga | Hei āwhina i te ākonga ki te ako, ka pānui te pouako i te kōrero "E Rongo e." Ka tapatapahia ngā rerenga kōrero ka tohaina ki ngā ākonga. Me pānui tēnā i tāna, tēnā i tāna, tēnā i tāna. Kāore e whakaaetia te whakaatu i ngā kōrero o runga i ngā pepa, me mau ā-hinengaro. Ka mutu ka whakaraupapa ngā ākonga i a rātou anō kia tika te rere o te kōrero. |
| Aromatawai | Ka whakaaturia tana tohungatanga ki te āta whakarongo kia taea ai te tīpako ngā ariā matua e pīrangitia ana |
| E Rongo e, |
| Te huatahi nā Ranginui, nā Papatūānuku. |
| I koha mai nei i te kūmara hei oranga tinana. |
| I whakatiputia e Nuku, i ahu mai i a Rangi, |
| Te wāhi mahana, tūranga mākūkū, |
| Kore rawa te hua kūmara e ngaro e. |
| Nāu i tupu ai he kai hei oranga tinana, oranga wairua, |
| Arā te one matua ki tēnā pito, ki tēnā pito. |
| Nau mai anō e Rongo me tō rangimārie, |
| hei whāriki, hei korowai aroha ki a koe ki a Papa. |
| Nau mai anō hei oranga tinana, hei oranga wairua mō ngā uri whakaheke, |
| Nau mai, whakatau anō mai. |
| E Rongo whakairi ake kia tīna, tīna! |
| Hui e, tāiki e! |
