Ngā Huatau Matua o te Tauanga: Ngā Tau Tōmua o te Kura
Ka āta aro atu ki ēnei āhuatanga o te tauanga, hei wero, hei whakawhānui i te whakaaro, i te kōrero o te ākonga.
Te Tūponotanga
1. Ko te matapae mehemea ka whakahua tētahi āhuatanga, kāore rānei, te pūtake o te tauanga. Ka whakatakoto whakaaro mō te otinga o tētahi pāpono tūponotanga māmā. Ka whakahua hei kupu, hei kīanga, hei kōrero rānei, pēnei i ēnei:
āe marika; kāore e kore; tika tonu. |
tērā pea; ākene pea; kāre pea e hua mai; āe pea. |
kore rawa; e kore rawa atu; taunga kore. |
Koinei ētahi o ngā kupu, o ngā kōrero, mō te matapae, engari he nui kē ake i ngā mea kua tuhia i runga nei. He tīmatanga noa iho ēnei mō tēnei taumata.
Te Tūhuratanga Tauanga
Ka whakatakoto pātai hei torotoro i te tuatahi. Me ako te ākonga ki te ui atu i te pātai kia tika. Kātahi ka kohikohi raraunga ki te whakautu i taua pātai.
1. Ko te whakarōpū taonga, ko te whakarōpū tau rānei, tētahi o ngā tino kaupapa o te tauanga i tēnei taumata. Ka hanga whakaari raraunga hei āwhina ki te whakaputa whakaaro.
2. Ka whakaatuhia ngā raraunga ki te kauwhata whakaahua. Ka whakamahia he pikitia, he tohu rānei.
3. Ka whakaputa whakaaro ki te matapaki i ngā otinga o te kauwhata whakaahua. Nā reira, ka akona te reo whakatairite. Hei tauira: he nui ake; he iti iho; ko te itinga; ko te rahinga; ko te nuinga; tokomaha ake; tokoiti ake.